Dito 69 : A muller, o home e o autobús
Coñecían
de memoria as 119 curvas que formaban a estrada que ía de Santomé a Ourense e
sabían como trazar cada unha delas. Tamén as 15 paradas obrigadas en todo o traxecto;
habería algunhas mais, alternativas, para deixar ao viaxeiro mais preto da
casa, e outras cando xurdía unha avaria ou o pinchado dunha roda. Eran o Home e
o Autobús, compenetrados, como si fosen dous nun.
A
muller, onde queira que estivera, deixaba o que fose para preparar o xantar
cando escoitaba o bucinazo baixando do Picoto dos Corvos. Hasta o Fistón se
botaría a correr, desde onde se encontrara, para chegar a Airas ao mesmo tempo
co seu amo.
Serían 25 anos seguidos de servizo; 9.125 días
incluídos sábados e domingos, sen vacacións; dúas viaxes de ida e volta diarias,
por veces reforzos de trasporte escolar, vodas, enterros…
O Home e o último Autobús que conducira,
xubilaríanse ao mesmo tempo, pero nunca se acabarían separando de todo. A
empresa, ao velos tan unidos, ofreceralle ao Home levalo para Santomé, o Home sopesouno pero non tiña onde
metelo e o Bus acabou quedando nun despezamento de Untes.
Un Día
que o Home baixara a capital, por “casualidade”, achegaríase a Untes e vería ao que fora seu
compañeiro xa medio despezado pero aínda lle quedaban algúns asentos en bo
estado; pediríalle permiso ao dono para levar un deles e así foi como, hasta
non fai moito, houbera na cociña que tiña o Home en Santomé, un dobre e cómodo
Asento daquel Bus.
O día cinco de febreiro do 2002, a Muller fora
vítima dun infarto cando se atopaba nesa cociña. O Home intentaría reanimala
naquel Asento sen poder conseguilo e falecería alí mesmo.
A Muller chamábase Olimpia, o Home Remigio
e o Autobús era o Pegaso Comet OR-29.715.
O Asento seguiu estando no sitio hasta que o
Home decidira retiralo definitivamente a unha cociña vella onde aínda sigue.
Fai uns días Remigio colleu o último autobús,
pero agora non ía el conducindo e o rumbo sería incerto. O único certo e que,
mentres estivo neste mundo, fora un bo home un bo pai e, tamén, un bo condutor.
.jpg)
